دعوة الى كل مدونى السبنسة لكسر أحتكار مدونى الدرجة الأولى.......

أول مرة تعرفت فيها على التدوين كانت عندما تم عرض حلقة" المدونين المصريين" على قناة الجزيرة القطرية كنت أسمع عن كلمة التدوين ولكنى لم أكن أدرك طبيعتها ومضمونها وأنا أتابع الحلقة أمسكت بورقة وقلم وأخذت أكتب أسماء المدونات التى تم أستضافة أصحابها فى الحلقة بهرت ايضا عندما ذكر الأستاذ" محمد حسنين هيكل" أسم مدونة بهية وكيف أنه يتابعها بشغف حتى أنه ينتظر مقالها أكثر من أنتظاره لمقال أى كاتب كبير .....بعد أنتهاء الحلقة قلت "ما بدهاش بقى ده الأستاذ نفسه بيتابع المدونات لازم الواحد يشوف أيه الحكاية" ....
لجأت الى أقرب نت كافيه كتبت العناوين التى عرفتها من الحلقة لأجد عالم باهر من الصراحة التى لم أعتادها أنا القارئ الجيد لصحف المعارضة ,صور ,كليبات ,نقد لاذع حتى النخاع والكثير والكثير مما أطوق للتعبير عنه...... مع أنتهاء التصفح وجدت نفسى أحلف بسماها وبتربها أنى حبقى واحد من المدونين خصوصا وأنا أصلا بحب الكتابة لله فى لله ومين عارف يمكن يعملوا حلقة تانية فى الجزيرة ويتكلم الأستاذ عنى ربنا يديله طولة العمر
كانت مشكلتى وقتها أزاى أعمل مدونة هل الواحد بيدفع فلوس عشان يأجر المدونة قعدت فى حيرة الى أن هدانى ربنا لأتنين من صحابى اللى أقدر أقول عليهم" ديدان" كمبيوتر ونت عرفنى واحد فيهم أزاى أنشئ مدونة على بلوجر دوت كوم ....مكدبتش خبر جمعت كل كتابتى التايهة اللى كتبتها أيام صعلكة الجامعة وقلت أهى خميرة بسيطة الواحد يبدأ بيها
سميت البلوجر" الغريب" وأخذت أزور كل المدونات الأخرى بشكل هستيرى على مبدأ "يناس ياعسل الغريب وصل" قعدت على دى الحال شهر والغريب أن محدش عبرنى برد واحد يفتح النفس دخلت فى مرحلة أكتئاب خصوصا أنى لاقيت بلوجرز أصحابها مابيتكلموش عن حاجة تقريبا وتلاقيى التعليقات الله ينور مثلا زى واحدة كاتبة أن هى صحيت من النوم ومالقيتش حاجة تكتبها ده بالذمة بوست يستحق خمسين تعليق حاجة تغيظ ......
وصلت لمرحلة أنى نويت أن ألغى المدونة اللى مزراش ولا واحد غير صحابى اللى بتحايل عليهم أنهم يزوروا المدونة وطبعا أنسى أن واحد من صحاب المدونات المشهورة يسأل فيك طبعا اللى على على ياعم وحتروح فين ياسبنسة وسط الدرجة الأولى المكيف....
قررت أنى حاواصل التدوين كنوع من" التناحة" المعروف بيها الى أن وصلت الى الحل السحرى عارفين أيه هوا
أياك تزور مدونة من مدونات الدرجة الأولى المكيف وعليك بالمدونات السبنسة اللى من فئتى وبدأت أبحث عن المدونات الجديدة أزورها وأتابع أصدارتها ولاقيت بالفعل أن الدم بيحن وبدأت البلية تلعب وظهرت التعليقات والمكنة طلعت قماش أخيرا
لذا فأنا أدعوا كل مدونى السبنسة من أمثالى لأن نصنع مايشبه التكتل الشبكى عن طريق وصلات ثابتة فى مدونة كل واحد فينا تكون بمثابة
البداية لتضامن مدونى السبنسة من أمثالى عشان يضمن كل واحد فى المدونين الجداد أنه مش حيمر باللى أنا مريت بيه
عشان كده أنا بدعوا كل واحد عايز يشترك فى التكتل ده اللى تحت أسم" مدونى السبنسة" أنه يبعتلى عنوان مدونته على ألأيميل بتاع المدونة أو من خلال التعليق على البوست
وأنا حجمعهم بأذن الله وأنشرهم فى بوست تانى و اللى عايز ياخدهم يبقى ياخدهم وينشرهم عنده فى المدونة الخاصة به تحت نفس العنوان
والله ولى التوفيق
الغريب